Upplýsingatorg

Árið 2004 var bæði verra og betra í umferðinni en árið 2003.  Fjöldi látinna og fjöldi banaslysa er sá sami á milli ára.  Slæmu fréttirnar eru þær að fjöldi eignatjóna jókst úr 7145 í 7848 og er þetta því tæplega 10% aukning milli ára.  Skv. gögnum tryggingafélaganna þá var aukning á tjónum milli ára en ekki alveg 10%.  Því má ætla að hluti af þessari aukningu sé einfaldlega hlutfallsleg aukning þess að óhöpp séu skráð til lögreglu.  Fjöldi lítið slasaðra minnkar örlítið milli ára úr 1076 í 1041 en hins vegar fjölgar slysum með lítilvæglegum meiðslum úr 667 í 693.  Má því segja að lítilvæglegu slysin séu í sama eða svipuðum farvegi og árið áður.  Góðu fréttirnar eru hins vegar þær að alvarlegum slysum fækkar úr 120 í 97 eða um tæp 20% og alvarlega slösuðum fækkar úr 145 í 115 sem eru rúm 20%.  Bæði alvarlega slasaðir og alvarleg slys eru í sögulegu lágmarki árið 2004.

Við samanburð á hinum Norðurlöndunum kemur í ljós að á Íslandi eru flest dauðsföll í umferðinni m.v höfðatölu þetta árið.  Á öllum Norðurlöndunum hefur banaslysum m.v. höfðatölu fækkað milli ára en á Íslandi hefur fjöldinn þó nánast staðið í stað.  Fjöldi banaslysa hefur staðið í stað en sökum örlítillar fólksfjölgunar milli ára fækkar slysum m.v. höfðatölu.  Íslendingar hafa sem áður segir flest slys, Svíar og Norðmenn eru með fæst slys og Finnar og Danir svo þar á milli.  Á Íslandi hafa verið talsverðar sveiflur í fjölda banaslysa þar sem fá tilvik hafa mikil áhrif á niðurstöðuna.