Tilgangur þess að taka í notkun rafræna ökurita er að einfalda mælingu á aksturs- og hvíldartíma og hindra  misnotkun. Þetta eykur umferðaröryggi, bætir vinnuaðstæður ökumanna og gerir samkeppni flutningafyrirtækja virkari og sanngjarnari.

Þau ökutæki, sem reglur EES um aksturs- og hvíldartíma ná til skulu hafa fasta ökurita. Ökuritinn skráir upplýsingar um aksturinn, svo sem hraða og aksturs- og hvíldartíma. Með aðstoð ökuritans sjá eftirlitsmenn Vegagerðarinnar til þess að farið sé að settum reglum.

Kerfi þetta var innleitt á Íslandi árið 2006 og voru fyrstu kortin framleidd í september það ár.  Öll ríki Evrópusambandsins hafa tekið kerfið upp og áætlað er að árið 2010 verði þetta kerfi einnig komið á í öllum löndum sem hafa undirritað AETR-samkomulagið, þ.e. þau lönd sem hafa skuldbundið sig til að hlíta reglum um aksturs- og hvíldartíma í öllum alþjóðlegum flutningum.

Nýja kerfið dregur úr vandamálum vegna svindls sem var viðvarandi í gamla pappaskífukerfinu.  Ekki er gerð krafa um að skipta um ökurita í þeim bílum sem þegar eru með skífuökurita og því munum við búa við tvöfalt kerfi í þó nokkur ár, þ.e. þar til búið er að skipta út öllum flotanum.